– Mentorprogrammet vil vere ein ekstra ressurs og opplæring som gjer at nye kjøpmenn får ein god start i kjøpmanns- og drivarrolla, fortel avdelingsdirektør Steinar Fredheim i Distriktssenteret.
– Dei siste åra har vi opplevd eit generasjonsskifte over heile landet, blant både kjøpmenn og bokhandlarar, og det har vore krevjande å få på plass nye folk til å ta over drifta. Mentor-ordninga skal bidra til å gjere det enklare å oppretthalde nærbutikken med varer og tenester nær folk på små stader.
Kvifor mentorprogram?
Mentoropplæringa skal vere eit eige program for kjøpmenn og drivarar av daglegvare og bokhandel som ynskjer å ha rolla som mentor for nye kjøpmenn. Opplæringa skal gi mentorane kunnskap og nettverk som set dei i stand til å utøve rolla som mentor på ein fagleg god måte. Med ei slik ordning vil ein kunne byggje eit større nettverk, i samarbeid med Distriktssenteret, drivarar, konsulentar og aktuell kjede. Etter opplæringa vil dei påmeldte kjøpmennene bli godkjende mentorar i Merkur.
Avgrensa pilot
Erfarne kjøpmenn og bokhandlarar er plukka ut for å vere mentorar i sin region i pilotprosjektet. Gjennom piloten ønskjer Distriktssenteret å lære meir om kva vi kan oppnå med å bistå nye kjøpmenn med hjelp frå ein erfaren kjøpmann. Mentorar og dei som får tilbod om bistand er plukka ut i nært samarbeid med butikkkjedane. I første omgang får 9 ferske kjøpmenn av daglegvare og bokhandlar moglegheit til å nytte tilbodet.
Om pilotprosjektet er vellukka ønskjer Distriktssenteret å tilby dette til nye kjøpmenn over heile landet frå 2025, og vil rekruttere erfarne kjøpmenn og bokhandlarar som mentorar i alle Merkur-regionar.
