– Det har vore ein krevjande prosess. På eit tidspunkt trudde eg ikkje at vi skulle klare det. Men plutseleg losna det, seier Merkur-konsulent Vigdis Myhre Næsseth som leia omstillings-prosjektet.
Omstillingsordninga i Merkur-programmet skal hjelpe kjøpmann og bygdesamfunn til å finne nye løysingar når ein nærbutikk står i fare eller har store problem med å få til lønsam drift.
LES: Slik kan butikken få krisehjelp
Kjøpmannen kan ta kontakt med den lokale Merkur-konsulenten, som har erfaring både med å gjennomføre omstillings-prosessar og få etablert nye butikkar, dersom ein butikk blir nedlagt.
Den vellukka redningsaksjonen som vart gjennomført i Innlandet, er den mest omfattande i Merkur-programmets historie.
Sløkte lyset
Det såg mørkt ut for Sel, Søre Osen, Lesjaverk, Atna, Sørskogbygda og Østby då Coop Innlandet varsla at dei ville avvikle den einaste butikken i bygda.
Merkur-konsulenten for Innlandet kom raskt på banen og fekk sett i gang eit stort omstillingsprosjekt. Gjennom tett dialog med butikksjefar, bygdene og kjedene lukkast det å få til gode utviklingsprosessar.
Heilt avgjerande
Det vart gjennomført opne folkemøte i alle bygdene. Etter kvart begynte det å kome fram forslag til nye løysingar. Både einskildpersonar og lokale bedrifter engasjerte seg.
Fleire stader gjekk bygdefolk saman om å etablere nye butikkar. På Østby vart det samla inn 800.000 kr i aksjekapital, fordelt på 146 aksjonærar. Både hytteeigarar, fastbuande og lokale bedrifter var med på spleiselaget, for å sikre eit butikktilbod i bygda.
Nærbutikkane har også fått betydeleg økonomisk støtte frå Merkur-programmet, i form av investeringsstøtte til kjøp av butikkbygg eller andre investeringar i butikken.
– Investeringsstøtte har vore heilt avgjerande for å redde desse butikkane, seier Vigdis Myhre Næsseth.
Døgnopen suksess
Dei seks butikkane har valt ulike løysingar når det gjeld kjede-tilknyting. To av butikkane profilerer seg som Matkroken, to har blitt Nærbutikken, ein har blitt Joker og ein har blitt Snarkjøp.
Butikkane på Lesjaverk, Østby og Sørskogbygda har fått suksess med døgnopen drift med delvis fjernbetjenting. Dei tre andre butikkane vurderer også å investere i teknologi som gjer det mogleg med utvida opningstider og delvis fjernbetjent drift. Alle butikkane har god og lønsam drift.
LES MEIR: Slik ble nærbutikken reddet