Frå skifterett til suksess
Då Jarle og Britt June tok over Matkroken Imsland i 2017, var butikken i ein krevjande situasjon med daglegvareomsetning under 4 millionar kroner. Gjennom god drift og nye tenester har dei snudd utviklinga og skapt ein solid og framtidsretta butikk med ei omsetning på 11 millionar i 2024.
– Det er ekstra gledeleg å kunne gi prisen til ein butikk som har vore finalist fleire år på rad. Matkroken Imsland er ein verdig vinnar, seier Merkur-konsulent Lars Helgeland.
Tenester langt utover det vanlege
Matkroken Imsland er ein typisk distriktsbutikk med rundt 100 husstandar i nærområdet. I tillegg til daglegvarer tilbyr butikken drivstoff, matservering, drosje og landbruks- og sommervarer i eit eige bygg ved sida av butikken. Dei har handlebuss for kundar som sjølv ikkje kjem seg til butikken. Kvar mandag formiddag inviterer butikken til gubbetreff i kafeen.
– Jarle og Britt June har skapt ein butikk med hjarte for bygda. Dei ser kva lokalsamfunnet treng, og leverer tenester langt utover det ein vanlegvis forventar, seier Helgeland.
Prisar i fleng – og endeleg Merkur
Matkroken Imsland har tidlegare fått utmerkingar frå både eigen kjede, kommunen og lokale lag og foreiningar. Veggen bak kassa er fylt med prisar, men det har mangla éi: Årets Merkur-butikk. Den får no sin rettmessige plass i samlinga.
