Kampanjen fokuserer på kor viktig butikken er både som møteplass, servicesenter og salsstad for daglegvarer. Målet er å redusere handels-lekkasjen og stimulere til meir lokal handel.

Gjennom denne kampanjen kan du både takke trufaste kundar for at dei sluttar opp om butikken – og utfordre dei som handlar lite lokalt, til å tenkje over kva butikken betyr for bygda eller småbyen. Lokal handel er ei investering i eit levande lokalsamfunn. I 2025 er Handle lokalt-dagen 18. oktober.

Lokalt samarbeid

Dei fleste butikkane markererer dagen ved å spandere kaffi, brus, is og kaker på kundane. Nokre butikkar går ut med spesielle tilbod. Andre nyttar anledninga til å invitere ordførar eller lokalavisa på besøk.

Merkur-programmet oppfordrar butikkane til å samarbeide med lokale lag og organisasjonar for å få til ei god markering av dagen. Nokre stader stiller bygdekvinnelag, ungdomslag, grendalag eller andre organisasjonar opp på butikken for å markere kor viktig butikken er for lokalsamfunnet. Fleire stader blir det lagt opp til underhaldning, quiz, konkurransar eller andre aktivitetar, i tillegg til servering.

Merkur-programmet jobbar for å utvikle daglegvarebutikkar i distrikta slik at dei kan gi eit best mogleg tilbod til kundane sine. Men det er like viktig at folk som bur på bygda, brukar lokalbutikken sin i størst mogleg grad. Slik kan kundane halde oppe levande lokalsamfunn, som kan vere attraktive både for dei som bur der i dag og dei som vurderer å etablere seg der.