Alle registrerte Merkur-butikkar med ekstraordinært høge straumkostnader vil kunne få straumstøtte. Det er ikkje krav om 10 km avstand til neste butikk, slik som i regelverket for investeringsstøtte.
Dette går fram av forskrift om ekstra Merkur-tilskot på grunn av høge straumprisar som no er revidert av Kommunal- og distriktsdepartementet.
Regelverket for straumstøtte inneber at butikkane får kompensasjon for sine straumkostnader (eks nettleige), når prisen er over 70 øre per kWh. Butikkane kan få dekka straumutgifter i perioden juli til oktober 2023. Butikkane vil kunne få dekka 80 prosent av kostnadane over 70 øre per kWh.
Kartlegg energibruk
Butikkar som vil søkje om straumstøtte, må først gjennomføre ei enkel kartlegging av energibruken, med oversyn over forbruk og kostnader. Butikken skal oppgi tre aktuelle tiltak for redusert energibruk. Dei som leverte kartlegging då dei søkte om straumstøtte for 2022 treng ikkje å levere denne på nytt.
Skjema og rettleiing for energikartlegging ligg på Merkurs nettside.
Søknadsskjema for straumstøtte er publisert i regionalforvaltning.no.
Ikkje dobbel støtte
Straumstøtta kjem i tillegg til andre støtteordningar i Merkur-programmet. Butikkar som får straumstøtte gjennom Merkur-ordninga, vil ikkje vere omfatta av energitilskotsordning gjennom Enova for same periode.
Straumstøtte gjennom Merkur kan heller ikkje kombinerast med anna offentleg straumstøtte, til dømes kommunal støtte, for same periode.