Mellom 230 og 250 Merkur-butikkar har fått tilsegn om straumstøtte for perioden september-desember 2022.
Pr. 20.februar har Distriktssenteret innvilga 382 søknader og fordelt 8,6 mill. kroner i straumstøtte.
For heile Norge
Regelverket for straumstøtte opnar for at butikkar frå heile Norge kan søkje om støtte, dersom straumkostnaden ligg over 70 øre per kilowattime. Då Distriktssenteret starta arbeidet med å planlegge ei ordning med straumstøtte, var ekstraordinært høge straumutgifter eit stort problem for butikkar på Vestlandet, Sørlandet og Østlandet. Midt-Norge og Nord-Norge hadde låge straumprisar.
Fleire butikkar frå Midt-Norge og Nord-Norge har fått straumstøtte for desember, då straumprisen var høg også i desse landsdelane.
Støtte frå fleire
Regelverket for straumstøtte seier at du ikkje kan få støtte frå kommunen eller Enova samtidig som butikken får støtte frå Merkur. Men det er mogleg å kombinere støtte frå ulike kjelder i ulike periodar. Butikken kan til dømes få kommunal støtte for juni-august og Merkur-støtte for september-desember.
Forskrifta for straumstøtte gjennom Merkur seier at eit konsern ikkje kan få meir enn 10 mill.kr i straumstøtte. Denne regelen har ikkje vore til hinder for at Coop-butikkar kan søkje om straumstøtte på lik linje med privateigde butikkar.
Ledige midlar
Merkur-programmet fekk ei ramme på 23 mill. kr til straumstøtte for utsette nærbutikkar. Etterspørselen etter støttemidlar har vore mindre enn det Kommunal- og distriktsdepartementet la til grunn, blant anna på grunn av lågare prisar utover hausten, samanlikna med rekordprisane i august/september.
Distriktssenteret og styret for Merkur-programmet har ein tett dialog med Kommunal- og distriktsdepartementet om ei større satsing på enøktiltak og eventuell vidareføring av ordninga med straumstøtte for 2023. Så langt er ingenting avklart.